Tre persona janë arrestuar në Vlorë, pasi dyshohet se kanë kanosur një 30-vjeçar për t’i marrë 30.000 euro.
Ngjarja është zbardhur pas kallëzimit të bërë nga shtetasi K. S., i cili ka deklaruar se në një lokal ishte kërcënuar nga tre persona, të cilët dyshohet se mbanin edhe armë zjarri, duke i kërkuar një shumë të konsiderueshme parash.
Sipas hetimeve paraprake, këta shtetas, mesditën e një dite më parë, në lagjen “Pavarësia”, kanë kanosur 30-vjeçarin që t’u jepte 30.000 euro dhe më pas i kanë marrë automjetin tip “BMW”, duke u larguar nga vendi i ngjarjes.
Policia e Vlorës ka finalizuar operacionin e koduar “Strike”, në kuadër të të cilit është bërë i mundur identifikimi, kapja dhe arrestimi i autorëve të dyshuar: A. G., 26 vjeç, M. B., 22 vjeç dhe M. H., 29 vjeç, të tre banues në Vlorë.
Gjatë operacionit, policia ka sekuestruar si automjetin e përdorur nga autorët, ashtu edhe makinën e marrë nga 30-vjeçari.
Materialet procedurale i janë referuar Prokurorisë së Vlorës për veprime të mëtejshme, për veprën penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim.